Lajmi për suspendimin e 11 zyrtarëve të Policisë së Kosovës, përfshirë drejtues të lartë rajonalë, komandantë dhe hetues policorë, lidhur me trajtimin e rastit të viktimës A. Z. në Vitomiricë të Pejës, është një zhvillim serioz që kërkon vëmendje të plotë publike dhe institucionale.
Uniforma e Policisë së Kosovës është simbol i shtetit, i ligjit dhe i sigurisë së qytetarit. Ajo duhet të jetë mburojë e qytetarit, jo mburojë e papërgjegjësisë!
Policia e Kosovës është ndërtuar me shumë sakrifica, mbi themelet e lirisë sonë të fituar me gjak e qëndresë. Prandaj, askush nuk duhet ta cenojë besimin e qytetarëve në këtë institucion kaq të rëndësishëm.
Nëse hetimet vërtetojnë se ka pasur neglizhencë, mosveprim apo shkelje të detyrës, përgjegjësia duhet të përcaktohet individualisht dhe në përputhje me ligjin, pavarësisht gradës apo pozitës së zyrtarit.
Suspendimi nuk është dëshmi fajësie, por një masë që duhet t’i shërbejë hetimit të pavarur dhe të paanshëm.
Ne kërkojmë: drejtësi për viktimën A. Z., transparencë për qytetarët dhe përgjegjësi për këdo që vërtetohet se ka shkelur ligjin!
Respekt për policët e ndershëm që i shërbejnë atdheut me dinjitet dhe përkushtim. Por edhe kërkesë të palëkundur për llogaridhënie ndaj kujtdo që shpërdoron besimin e popullit.
Kosova për të cilën u sakrifikuan breza të tërë shqiptarësh duhet të jetë shtet i së drejtës, ku qytetari mbrohet dhe ku askush nuk qëndron mbi ligjin!
Drejtësia nuk është hakmarrje. Drejtësia është përgjegjësi, e vërtetë dhe dinjitet njerëzor.
🇦🇱🇽🇰 PËR NJË KOSOVË ME LIGJ, DREJTËSI DHE DINJITET!
Me respekt dhe përgjegjësi qytetare,
Sak Muji
Burimi/Facebook
Leave a Reply