“Pa ty pikëllim i thellë…” / 50 vjetori i Dritan Prroj, pastorit të vrarë për gjakmarrje / Ja mesazhi emocionues i bashkëshortes
Kanë kaluar pak më shumë se 15 vite nga vrasja e pastorit Dritan Prroj në Shkodër i cili u ekzekutua për gjakmarrje.
15 vite pas asaj ngjarje të rëndë, sot pastori Prroj mbush 50 vjetorin e lindjes.
Në këtë përvjetor, bashkëshortja e tij Elona Prroj përmes një mesazhi plot emocione ka përkujtuar këtë ditë të rëndësishme për familjen e tyre.
“Pikëllimi është i thellë”, shprehet Elona Prroj e cila kujton se ëndrrat me bashkëshortin e saj ishin aq të mëdha dhe se ai la pas një dhimbje që nuk shuhet asnjëherë.
Dritan Prroj u vra në tetorin e 2010 në pedonale në Shkodër nga shtetasi Mark Njembza. Ky i fundit e qëlloi pastorin për të marrë gjakun pasi në vitin 2005 xhaxhai i pastorit kishte vrarë një person të familjes Njembza. Pas vrasjes Mark Njembza u arrestya menjëherë.
Që prej asaj dite, familja Prroj jeton me një plagë të madhe në zemër duke e kujtuar gjithmonë Dritanin në çdo ditë të jetës.
Statusi i plotë i Elona Prroj, bashkëshortes të pastorit:
Sot do të mbushje pesëdhjetë vjeç.
Dhe çuditërisht, në ditë si kjo, e gjej veten duke kërkuar si një fëmijë i vogël, duke kërkuar qiellin për një shenjë, një re në formë shprese, një pëshpëritje, një mesazh… çdo gjë që më kujton se je ende disi afër.
Ike kaq i ri nga kjo botë, kur ëndrrat tona ishin ende të gjalla në kulmin e tyre dhe zemrat tona ende besonin se kishim dekada përpara.
Megjithatë sot, ti feston me engjëjt, dhe ne do të donim të dëgjonim zhurmën e gëzueshme të asaj feste.
Ditëlindja jote është gjithmonë e mbushur me lot, kujtime, dhe dashuri që vdekja nuk mund ta varros kurrë.
Jeta pa ty ka qenë e vështirë. Kemi njohur pikëllim të thellë, por edhe hir të thellë. Jezusi na ka bartur gjatë netëve që menduam se do të na thyente, duke na dhënë fuqinë jo vetëm për të mbijetuar mungesën tënde, por disi të rritemi akoma, të duam, të jetojmë akoma.
Familja që le pas është rritur. Ishim tre, dhe tani jemi pesë. Eshte mahnitese kur mblidhemi te gjithe bashke, duke folur per ty dhe duke ndare histori me ata qe nuk paten mundesi te te njohin kurre. Do të buzëqeshje me krenari nëse do të na shihje tani.
Sot u mbushën pesëdhjetë vjet, dhe mungesa jote ende jehon nëpër çdo dhomë, në çdo festë dhe në çdo ditë të zakonshme.
Gëzuar ditëlindjen në Parajsë. Derisa të takohemi përsëri, një pjesë e jona do të jetë gjithmonë duke pritur me padurim përjetësinë.
Burimi/Facebook/Shkodra Live
Leave a Reply