Një ngjarje e rëndë ka tronditur komunitetin shqiptar në Austri, ku një 47-vjeçar nga Kosova dyshohet se ka vrarë brutalisht bashkëshorten e tij 38-vjeçare.
Sipas mediave austriake, burri besonte se gruaja e tij ishte shtrigë dhe merrej me magji të zezë, bindje kjo që dyshohet se lidhet me gjendjen e tij të rënduar psikike.
47-vjeçari, i cili ishte ndarë nga bashkëshortja, dyshohet se e kishte qëlluar atë tri herë me një pistoletë të tipit Beretta. Pas të shtënave, ai dyshohet se e kishte sulmuar viktimën edhe me një kaçavidë, duke i shkaktuar dhjetëra plagë. Ngjarja ka marrë përmasa edhe më tronditëse pas zbulimit të detajeve mbi gjendjen mendore të autorit të dyshuar.
Në këtë rast është përfshirë edhe një tjetër kosovar, 45 vjeç, i cili akuzohet se i kishte siguruar armën 47-vjeçarit, ndonëse dyshohet se ishte në dijeni të qëllimit të tij për të vrarë bashkëshorten.
Sipas raportimeve të medias austriake Heute, gjatë qëndrimit në burg, 47-vjeçari vazhdonte të fliste për shtriga, magji të zezë dhe demonë. Ai madje i përshkruante zyrtarët e burgut si njerëz që përgatiteshin për ferr.
Një raport mjekësor e ka vlerësuar të dyshuarin si person që vuan nga psikoza dhe që nuk konsiderohet penalisht përgjegjës sipas këtij vlerësimi. Megjithatë, përcaktimi përfundimtar i përgjegjësisë penale i takon drejtësisë austriake.
Një grua 38-vjeçare humbi jetën në mënyrë tragjike, ndërsa rasti ngre shqetësime serioze për dhunën ndaj grave dhe rrezikun e mosidentifikimit në kohë të sjelljeve të dhunshme.
Burimi/Facebook/joq.kosovo
Leave a Reply