Këngëtari i njohur nga Tetova, Shpat Kasapi, ka ndërruar jetë pas një ataku kardiak gjatë qëndrimit në Itali. Lajmi është konfirmuar nga burime pranë familjes dhe mediave në Maqedoninë e Veriut.
Shpat Kasapi ishte një nga artistët më të pëlqyer të muzikës moderne shqiptare, me një karrierë që nisi që në fëmijëri dhe që u shtri në më shumë se dy dekada krijimtari.
Nga “Bletëzat 98” te skenat më të mëdha shqiptare
I lindur dhe rritur në Tetovë, ai ndoqi shkollën fillore “Liria”, më pas kolegjin turk “Yahya Kemal” në Shkup, ndërsa studimet e larta i përfundoi në Universitetin “FON”.
Hapat e parë në muzikë i hodhi që në moshën 13-vjeçare, ku fitoi çmimin e parë në festivalin “Bletëzat 98” në Tetovë. Talenti i tij u spikati shpejt edhe në skenat për të rritur, duke triumfuar në “Këngët e Stinës 2002” në Tiranë, ku fitoi çmimin e parë, si dhe duke marrë çmime të publikut në “Nota Fest 2003” dhe “Albafest 2003” në Shkup.
Një karrierë e mbushur me çmime dhe hite
Pas sukseseve të para, Kasapi u bë një nga figurat më të dashura të festivaleve shqiptare. Ai u vlerësua me çmime në Top Fest, Kënga Magjike, Zhurma Show Awards, si dhe në evente të tjera ku këngët e tij u pritën me shumë entuziazëm nga publiku.
Disa nga çmimet kryesore:
• “Pop Idol 2004”
• “Interpretuesi më i mirë” – Netët e Klipit
• “Interpretuesi më i mirë” – Top Fest 1
• “Hit i vitit” – Kënga Magjike 2004
• “Çmimi i publikut” – Kënga Magjike 2005
• “Best Male 2010” – Zhurma Show
Lamtumira e një artisti që la gjurmë
Lajmi i ndarjes nga jeta të Shpat Kasapit ka sjellë reagime të shumta nga kolegë, miq dhe fansa, të cilët po e kujtojnë si një artist të përkushtuar, energjik dhe të dashur me publikun.
Muzika e tij do të mbetet një pjesë e rëndësishme e kujtesës muzikore shqiptare.
Ngushëllime familjes, miqve dhe gjithë adhuruesve të tij.
Burimi/Facebook/Portali Shkodra Sot
Leave a Reply