Ka iniciativa që të bëjnë të ndalosh, të mendosh dhe të pyesësh veten: Si
është e mundur që një gjë kaq e bukur të kalojë në heshtje?
Në Pjetroshan të Malësisë së Madhe, një banor i zonës, i kthyer nga
emigracioni, ka sjellë një ide të veçantë dhe të rrallë: ka hapur një
Bar-Bibliotekë, “Bar Book”, një hapësirë ku libri, kafeja, kultura dhe
njerëzit mund të takohen.
Një ide e thjeshtë në dukje, por me një vlerë të jashtëzakonshme për
komunitetin.
Dhe pikërisht për këtë arsye, kjo nismë duhet vizituar, mbështetur,
promovuar dhe bërë e njohur, jo vetëm në Malësi të Madhe, por në mbarë
Shqipërinë.
Është e dhimbshme të shohësh se një nismë e tillë nuk ka marrë vëmendjen
që meriton. Do të doja që drejtuesit e Bashkisë Malësi e Madhe,
këshilltarët bashkiakë dhe institucionet vendore, në vend që të qëndrojnë
larg, të kishin shkuar ta vizitonin, qoftë edhe thjesht nga kureshtja.
Një vend ku mblidhen libra, ku mund të flitet për letërsinë, ku mund të
zhvillohen takime me shkrimtarë, poetë, historianë, mësues e nxënës, ku
mund të promovohen libra dhe ku një i ri mund të ulet të lexojë një libër,
duhet parë si pasuri e komunitetit.
Prandaj lind edhe një pyetje: Pse të mos jetë kjo hapësirë një partner i
institucioneve dhe jo një nismë që lihet në heshtje apo përballet
me pengesa?
Malësia e Madhe ka një histori të jashtëzakonshme në mbrojtje të lirisë,
identitetit kombëtar dhe gjuhës shqipe. Është një trevë që ka dhënë
kontribut të madh në historinë tonë kombëtare. Pikërisht për këtë, një
vend që i kushtohet librit dhe gjuhës shqipe merr një kuptim edhe më të
veçantë.
Por më shumë se të bëjmë pyetje, sot duhet të bëjmë një thirrje.
Ku janë shkrimtarët dhe poetët?
Ku janë shkrimtarët e Malësisë së Madhe dhe të Shkodrës?
Ku janë poetët, historianët, mësuesit e letërsisë dhe të gjuhës shqipe?
Ku janë miqtë e librit?
Ky njeri u ka krijuar një hapësirë. Një lokal ku mund të organizohen
takime letrare, promovime librash, biseda me autorë, orë mësimi, diskutime
me të rinjtë dhe aktivitete kulturore.
Ja ku e keni hapësirën që shpesh thoni se ju mungon!
Pse të mos shkojë një mësues me nxënësit e tij në Bar Book dhe të
zhvillojë një orë ndryshe letërsie?
Pse të mos organizohet aty një takim me një poet?
Pse të mos prezantohet një libër i ri?
Pse të mos u dhurohen fëmijëve dhe të rinjve libra?
Pse të mos mblidhen aty miqtë e librit?
Mundësitë janë të pafundme.
Edhe Ministria e Kulturës duhet ta shohë këtë nismë
Do të ishte shumë e bukur që edhe institucionet kombëtare të kulturës të
interesoheshin për këtë hapësirë. Të dërgonin përfaqësuesit e tyre,
të njiheshin nga afër me këtë përvojë dhe, pse jo, të kontribuonin me
libra për bibliotekën.
Një kontingjent librash të dhuruar për fëmijët, të rinjtë dhe banorët e
zonës do të ishte një gjest i vogël në kosto, por i madh në vlerë.
Sepse kështu ndërtohet dashuria për librin.
Jo vetëm me fjalë.
Me libra. Me njerëz. Me shembuj. Me hapësira ku libri jeton.
Unë e pashë me sytë e mi…
Kur dëgjova për herë të parë për këtë iniciativë, pothuajse nuk po u
besoja veshëve.
Por kur shkova dhe e pashë me sytë e mi, më besoni, mu mbushën sytë me
lot nga emocioni.
Unë e kam dashur dhe e dua librin dhe do ta dua për sa kohë sytë do të
më lejojnë të lexoj.
Dhe kam një dashuri të veçantë për ata njerëz që, në vend që vetëm
të flasin për kulturën, kujtohen të bëjnë diçka konkrete për librin,
për gjuhën shqipe dhe për komunitetin e tyre.
Prandaj, sot dua t’u drejtohem të gjithëve:
Ju politikanë, drejtues institucionesh, përfaqësues të pushtetit vendor,
shkrimtarë, poetë, historianë, mësues të gjuhës dhe letërsisë shqipe,
artistë dhe miq të librit – afrohuni!
Shkoni në Pjetroshan.
Vizitojeni Bar Book-un.
Uluni aty.
Flisni për librin.
Merrni me vete fëmijët dhe nxënësit.
Organizoni një takim.
Dhuroni një libër.
Dhuroni një ide.
Dhuroni pak nga koha juaj.
Sepse ndonjëherë, një iniciativë e vogël në një fshat mund të kthehet
në një qendër të madhe kulture.
Dhe ndoshta pikërisht këtu, në Pjetroshan të Malësisë së Madhe, mund
të nisë një histori e re.
Një histori ku një Bar Book nuk është thjesht një lokal.
Është një vend ku njerëzit takohen me librin.
Ku të rinjtë takohen me dijen.
Ku gjuha shqipe dëgjohet, lexohet dhe dashurohet.
Ku kultura nuk mbetet vetëm në fjalime, por bëhet pjesë e jetës së
përditshme.
Lum ai njeri që pati një ide kaq të bukur dhe vendosi ta bëjë realitet!
Tani është radha jonë ta mbështesim.
Mos ta lëmë të kalojë në heshtje.
Shkoni në Pjetroshan. Vizitojeni Bar Book-un. Përhapeni këtë përvojë.
Bëjeni të njohur.
Sepse ndoshta është pikërisht kjo ajo që i duhet Malësisë së Madhe: jo
vetëm të kujtojë historinë e saj të madhe, por të krijojë edhe histori
të reja për brezat që vijnë.
Uroj me gjithë zemër që Bar Book-u i Pjetroshanit të bëhet një qendër e
gjallë kulture dhe një emër i njohur jo vetëm në Malësi të Madhe, por
në mbarë Shqipërinë.
Dhe kjo mund të ndodhë vetëm nëse ne zgjedhim të mos heshtim.
Libri meriton të ketë shtëpinë e tij.
Pjetroshani ia ka hapur derën.
Tani le të hyjmë të gjithë.
Shkruar nga Luigj Shkodrani
Leave a Reply