Më 29 gusht 1990, në Kosovë erdhi delegacion i Senatorëve dhe Kongresistëve Amerikanë, i prirë nga senatori Bob Dole, ky merrnin pjesë John W. Warner nga Virxhinia, Jake Garn nga Utah, Don Nickles nga Oklahoma, Alfonse M. D’Amato nga Nju Jorku, Steve Symms nga Idaho dhe Connie Mack nga Florida.
Në rrethana të okupimit të Kosovës nga Serbia, policia serbe me masa represive e me gaz lotsjellës nuk lejoi tubimin e shqiptarëve për të përshëndetur delegacionin amerikan, madje mezi lejoi ardhjen e delegacionit nga aeroporti në hotelin Grand.
Kjo vizitë ishte pikënisje për mbështetjen e Kosovës nga SHBA-ja për largimin e regjimit serb nga Kosova. Kërkesa e Presidentit Rugova ndaj senatorët ishte e qartë dhe mbeti e pandryshueshme: pavarësia e Kosovës është e vetmja zgjidhje për paqe në Ballkan. Kjo vizitë u pasua nga udhëtimi i Presidentit Rugova në SHBA menjëherë në shtator 1990, për ta ripërsëritur qëndrimin e tij të mbështetur nga populli i Kosovës.
Sot, pas 34 vitesh reflektojmë shumë më qartë për rëndësinë historike të kësaj vizite. I gjithë populli i Kosovës mbetet thellësisht mirënjohës për rolin e këtij delegacioni, i cili hapi dyert e SHBA-së dhe botës perëndimore për të siguruar mbështetjen për çlirimin dhe pavarësinë e Kosovës.
Në nder të këtij delegacioni dhe për të përkujtuar rëndësinë e kësaj vizite, më 29 gusht 2020, Ministria e Jashtme e Republikës së Kosovës vendosi pllakën përkujtimore para hotelit Grand.
Përpjekjet tona për një Kosovë të integruar në BE dhe NATO vazhdojnë. Përpjekjet tona për fuqizimin e demokracisë dhe zhvillim ekonomik janë të përhershme.
Zoti e bekoftë miqësinë e Republikës së Kosovës me Shtetet e Bashkuara të Amerikës!
Burimi/Facebook
Leave a Reply