Më 14 prill 1945, në Tiranë u ekzekutua Terenc Toçi (Italisht: Terenzio Tocci), politikani shqiptar me origjinë arbëreshe. Terenc Toçi lindi më 9 mars 1880, në San Cosmo Albanese, Kalabri, Mbretëria e Italisë. Ai diplomoi për drejtësi. Në vitet 1908-09 shkoi në SHBA dhe zhvilloi një fushatë sensibilizimi për shqiptaro-amerikanët për domosdoshmërinë e pavarësisë së Shqipërisë. Më vonë Toçi shkoi në Shqipëri dhe mori pjesë në revoltën shqiptare të vitit 1910 dhe atë të vitit 1911. Më 26/27 prill 1911 në Orosh, Toçi mblodhi krerët mirditorë dhe shpalli pavarësinë e Shqipërisë, ngriti flamurin e Shqipërisë dhe krijoi një qeveri të përkohshme. Ai ishte një nga pjesëmarrësit e Kongresit Shqiptar të Triestes në vitin 1913. Toçi shërbeu në qeveritë shqiptare të mbretit Zog përpara pushtimit italian si Ministër i Ekonomisë Kombëtare. Gjatë pushtimit italian të Shqipërisë në Luftën e Dytë Botërore, Toçi shërbeu si deputet i parlamentit, veçanërisht si Kryetar i tij nga viti 1940 deri më 1943. Pas Luftës së Dytë Botërore Toçi u akuzua në Shqipërinë komuniste për tradhti të lartë dhe bashkëpunim me Gjermaninë naziste. Gjyqi filloi më 1 mars 1945 dhe vendimi u dha më 13 mars. Toçi së bashku me 16 persona të tjerë u dënuan me vdekje. Ekzekutimi ndodhi më 14 prill 1945. Toçi dhe të tjerët u hodhën të gjithë në një varr të përbashkët.
Burimi/Facebook
Leave a Reply