Tragjedia më e madhe e shqiptarëve gjatë një shekulli nuk ka qenë vetëm armiqësia e jashtme, por komunizmi dhe trashëgimia e tij shkatërruese, që vazhdon të helmojë shoqërinë shqiptare në Shqipëri dhe Kosovë.
Komunizmi nuk ishte thjesht një sistem politik. Ishte një mekanizëm shtypjeje që institucionalizoi frikën, shpifjen, servilizmin, tradhtinë dhe eliminimin e kundërshtarëve. Gjatë Luftës së Dytë Botërore dhe pas saj, patriotë, intelektualë dhe atdhetarë të devotshëm u përndoqën, u burgosën dhe u eliminuan vetëm pse mendonin ndryshe.
Por dëmi më i madh i komunizmit nuk përfundoi me rënien e tij. Ai mbijetoi si mentalitet!
Një mentalitet që e sheh kundërshtarin si armik, meritën si kërcënim, shpifjen si armë dhe pushtetin si pronë private. Një kulturë ku besnikëria ndaj klanit vlen më shumë se ndershmëria, ku konkurrenca eliminohet dhe ku institucionet përdoren për interesa personale.
Sot, në Shqipëri dhe Kosovë, pasojat e kësaj trashëgimie shfaqen në kapjen e institucioneve, fabrikimin e akuzave, shkatërrimin e reputacionit të njerëzve me vlera dhe përjashtimin e atyre që nuk pranojnë t’i nënshtrohen sistemit.
Flasin për moral, por moralin e përdorin si maskë. Flasin për drejtësi, por e kërkojnë vetëm kundër të tjerëve. Flasin për kombin, ndërsa interesin personal e vendosin mbi interesin kombëtar. Madje mendojnë se mund ta mashtrojnë edhe Zotin!
Korrupsion ka kudo në botë. Por korrupsioni i rrënjosur në mentalitetin komunist nuk synon vetëm pasurimin. Ai kërkon nënshtrimin e individit, kontrollin e shoqërisë dhe shkatërrimin e kujtdo që guxon të jetë i pavarur.
Një komb nuk shkatërrohet vetëm kur ia pushtojnë tokën. Shkatërrohet edhe kur ia helmojnë ndërgjegjen, ia përmbysin vlerat dhe ia largojnë njerëzit më të mirë!
Prandaj shqiptarët kanë nevojë për më shumë se ndryshim qeverish. Kanë nevojë për reforma rrënjësore në arsim, drejtësi dhe institucione, për rikthimin e meritokracisë dhe për çlirimin nga kultura e servilizmit, urrejtjes dhe nënshtrimit.
Kjo nuk është luftë kundër njerëzve që kanë jetuar nën komunizëm, por kundër një mentaliteti që vazhdon të riprodhojë padrejtësi edhe në emër të demokracisë.
Komunizmi nuk u përpoq t’ua merrte shqiptarëve vetëm lirinë. Ai u përpoq t’ua shkatërronte dinjitetin, ndërgjegjen dhe besimin te njëri-tjetri.
DHE DERISA TË ÇLIROHEMI NGA KY MENTALITET, MUND TË NDRYSHOJMË QEVERI E PARTI, POR NUK DO TA NDRYSHOJMË FATIN E SHOQËRISË SONË!
Armiku më i rrezikshëm i një kombi nuk është gjithmonë ai që e sulmon nga jashtë, por mentaliteti që e shkatërron nga brenda.
Burimi/Facebook
Leave a Reply