Kryeministri shqiptar Sali Berisha i ka bërë thirrje autoriteteve serbe që të mos prekin lapidarin e dëshmorëve të UÇPMB-së në Preshevë.
“Prej disa javësh tensionet politike në Luginën e Preshevës po rriten si rezultat i një kërcënimi nga autoritetet e Beogradit për heqjen e monumentit të Martirëve të Lirisë që ranë në trojet e tyre etnike në mbrojte të lirisë dhe të drejtave njerëzore të shqiptarëve të Preshevës të mohuara atyre nga regjimi barbar i Sllobodan Millosheviçit. Ky kërcënim i autoriteteve serbe është një dëshmi tjetër e albonofobisë së politikës zyrtare të Beogradit”, theksoi kryeministri Berisha.
Ai i bëri thirrje autoriteteve serbe të lënë mënjanë konfliktet e vjetra dhe të mos provokojnë tensione.
“Qeveria shqiptare i bën thirrje autoriteteve të Beogradit të lënë mënjanë praktikat e vjetra albanofobe, të respektojnë pakicën shqiptare që jeton në trojet e veta etnike në Serbi dhe jep ndihmesën e saj në stabilitetin dhe zhvillimin e vendit. Qeveria shqiptare i bën thirrje shqiptareve të Luginës së Preshevës të mos provokohen në asnjë rrethanë nga ata, të cilët kanë vetëm një qëllim, të spastrojnë etnikisht komunat e tyre, t’i largojnë ata me një mënyrë apo një tjetër nga trojet e tyre etnike mijëravjeçare. Vërtet vandalët mundën me forcën dhe dhunën shtetërore të rrënojnë një përmendore të luftëtarëve, atë të Martirëve të Lirisë së shqiptarëve por ky është vetëm akt frike. Të rënët tanë nuk vdesin kurrë”, ka nënvizuar kryeministri shqiptar, pas deklaratave kërcënuese dhe paralajmëruese të kryeministrit serb Ivica Daçiq dhe presidentit Tomislav Nikoliq se afati i fundit për heqjen e lapidarit të UÇPMB-së është 17 janari, ose ai do të hiqet dhunshëm.
LSI: Daçiç po provokon shqiptarët e Luginës
Një reagim i ashpër ka pasuar edhe nga Lëvizja Socialiste për Integrim. Në një deklaratë për shtyp nënkryetarja e kësaj force politike, Klajda Gjosha ka deklaruar se kërcënimet ndaj popullsia shqiptare e Luginës së Preshevës me heqjen e monumentit dedikuar dëshmorëve të rënë të Ushtrisë Çlirimtare të Preshevës, Medvegjës dhe Bujanocit janë provokuese.
“I cilësojmë qëndrimet e fundit të Kryeministrit Daçiç si provokime të hapura ndaj popullsisë shqiptare të Luginës së Preshevës, të cilat nuk janë aspak në linjë me frymën demokratike të Bashkimit Evropian dhe si tërësisht të panevojshme në kontekstin konstruktiv historik ku ndodhet sot rajoni i Ballkanit Perëndimor”, ka theksuar Gjosha.
LSI i bëri thirrje kreut të qeverisë serbe që të tërheqë një deklaratë të tilla dhe inkurajoi përfaqësuesit e zgjedhur të faktorit shqiptar në Serbi të reagojnë me përgjegjshmëri dhe pjekuri demokratike ndaj çdo lloj kërcënimi. (INA)
Per”Alba – Dansk” Shkodrani
Leave a Reply