Edi Rama dhe “Këneta” e Politikës Shqiptare…
Alb Media:
Edi Rama, një kryeministër që e ka bërë talljen, ironinë dhe përçmimin pjesë të diskursit të tij politik, sërish nuk zhgënjeu në arrogancën e tij kur u shpreh për listën e kandidatëve të Partisë Demokratike në Shkodër. Me një gjuhë që nuk i ka hije as një qytetari të zakonshëm, e jo më një kryeministri, ai e quajti këtë listë “kënetë”, duke shprehur “respekt” vetëm për një kandidate, Greta Bardelin.
Por a ka të drejtë Edi Rama të gjykojë në këtë mënyrë kandidatët e një partie kundërshtare? A është ky roli i një kryeministri, të cilit i takon të jetë mbi palët dhe të respektojë procesin demokratik? Arroganca e pushtetit dhe përçmimi i popullit Duke i quajtur kandidatët e Partisë Demokratike “personazhe qesharakë, groteskë”, Rama jo vetëm që fyen kundërshtarët politikë, por edhe zgjedhësit e tyre. Në fund të fundit, këta kandidatë janë përfaqësues të një pjese të popullit shqiptar, të qytetarëve që besojnë tek ata dhe tek vizioni i tyre politik. Por si gjithmonë, për Edi Ramën, qytetarët që nuk i shërbejnë atij ose që nuk e votojnë, nuk vlejnë asgjë.
Një kryeministër që i lejon vetes të përdorë një gjuhë kaq të ulët për të sulmuar kundërshtarët, nuk tregon forcë, por frikë. Nuk tregon superioritet politik, por një papërgjegjshmëri totale ndaj funksionit që mban. Ai tregon se nuk mund të bëjë një debat të ndershëm, nuk mund të përballet me argumente, por vetëm me sulme dhe epitete fyese. Pse Edi Rama e ka frikë Shkodrën? Nuk është hera e parë që Rama e përçmon Shkodrën dhe qytetarët e saj. Që nga viti 2013, ai ka ndjekur një politikë sistematike për ta dobësuar këtë qytet, duke e lënë pas dore në investime dhe duke e trajtuar si një bastion politik kundërshtar që duhet shkatërruar. Ai ka tentuar ta poshtërojë dhe ta nënçmojë Shkodrën në çdo formë, por pavarësisht kësaj, Shkodra ka mbetur një nga qytetet më opozitare në Shqipëri.
Dhe tani, në prag të zgjedhjeve, përballë një sfide të madhe, ai përdor retorikën e përbuzjes, duke shpresuar se kjo do të minojë besimin e qytetarëve tek kandidatët e opozitës. Në fakt, ndodh e kundërta: sa më shumë që Edi Rama përpiqet të përçmojë dhe të shtypë Shkodrën, aq më shumë Shkodra qëndron e patundur përballë tij. Një kryeministër që i frikësohet demokracisë
Duke etiketuar kandidatët e opozitës si të padenjë për parlamentin, Rama tregon qartë se ai nuk e respekton demokracinë. Sepse në një vend demokratik, është populli ai që zgjedh dhe gjykon, jo kryeministri. Por Rama nuk e njeh këtë parim. Ai e sheh pushtetin si diçka absolute, si një mjet për të kontrolluar gjithçka dhe për të eliminuar çdo kundërshtar që guxon të sfidojë regjimin e tij.
Në fakt, nëse ka një kënetë në politikën shqiptare, ajo është vetë qeverisja e Edi Ramës. Kënetë është kur mbush parlamentin me deputetë të blerë, me njerëz pa identitet politik, që janë aty vetëm për t’i shërbyer shefit të madh. Kënetë është kur një kryeministër ka frikë nga zgjedhjet e ndershme dhe përpiqet të kontrollojë çdo institucion, çdo votë, çdo vendim. Kënetë është kur shantazhon mediat, kur eliminon opozitën dhe kur drejton vendin si një autokrat i pashpirt.
Nëse Edi Rama kërkon një këneta të vërtetë, ai mjafton të shohë pasqyrën. Atje do të gjejë fytyrën e sistemit të kalbur që ka krijuar.
Por Shkodra nuk është kënetë. Shkodra është qyteti i rezistencës, qyteti i kulturës, qyteti që nuk përkulet përpara askujt. Dhe në 11 maj, qytetarët e saj do t’i tregojnë Edi Ramës se sa e gabuar është qasja e tij përçmuese.
Pergatiti: Koja Leonard:
Burimi/Facebook/Alb Media
Leave a Reply