Të nderuar delegat.
Zonja dhe zotërinjë
Anëtarë të Grupit Parlamentar
I nderuar doktor Berisha.
Fjalën time drejtuar këtij kuvendi shprese e kam ndërtuar në formën e një eseje, por kjo nuk do të thotë që do të jetë shumë e gjatë, thjeshtë dua ti shmang duartrokitjet.
1. Si e kam parë unë politikën!.
Politikën nuk e kam parë kurrë si një bankomat, apo mjet për zgjidhjen e problemeve të mia përsonale.
Si utilitarist dhe idealistë që jam politikën e kam konsideruar si rrugën e arësyes për të zbutur dhe zgjidhur sa më shumë probleme për sa më shumë njerëz në këtë vend.
Një vend i pasur me resurse natyrore si ky i yni ka nevoj vetëm për një gjë: Të mos e vjedhin zyrtarët e shtetit, pra të përzgjidhen me kujdes dhe përkushtim njerëzor dhe ligjor administratorët publik në mënyrë që të menaxhohen me efiçencë dhe efikasitet burimet e pafundme natyrore që Zoti na i ka dhënë me bollëk.
A mundemi ne demokratët ta afrojmë këtë shërbim ndaj qytetarëve shqiptarë?
Unë them që po, kemi burime njerëzore që i zotërojnë të gjitha standartet për ta kryer këtë shërbim jetik për rritjen e mirëqenjes në përputhje me resurset e vendit.
Këtë e kemi dëshmuar në vitet 92- 96 dhe në mënyrë të jashtëzakonshme në mandatin 2005- 2009.
Këtë duhet të bëjmë edhe sot në këtë kuvend, të zgjedhim njerëzit më të përkushtuar, më të zotë, më të spikatur…
2. Doktori ky sfidant i përjetshëm.
E kam fjalën për Doktor Berishën.
Shumë njerëz në këtë sallë dhe jashtë saj Doktorin e duan me zemër, ka bile disa që janë ulur rreth tij që e shohin si Mesia. S’kanë pikë faji, disa prej tyre i ka nxjerrë nga mesjeta dhe i ke rehatuar përjetësisht.
Por dashuria e përjetshme për mua është utopi dhe e kushtëzuar .
Sapo u soset dashuria apo tagjia ata i këpusin veringët dhe e kafshojnë të “dashurin” e tyre .
Luli ishte i fundit që i këputi zinxhirat dhe desh hëngri të zotin.
Unë nuk e dua Doktorin,
por e respektoj për atë qe është
dhe për atë që bën.
Shpesh herë e kemi dëgjuar një anektodë që përdoret për rrugëtimin politik të doktorit, bile ai e ka treguar edhe vet atë: Lumi nuk kalon dy herë në të njëjtin shtrat.
Ju doktor jeni provuar që nuk jeni lum, aq më pak shtrat lumi.
Ju jeni dëshmuar në kohë që jeni një vullkan.
Faleminderit që u ndeze dhe po çliron energji në të katër anët e vendit.
E nxore Partinë Demokratike nga këneta 8- vjeçare ku po kalbej dhe po shndërrohej në humus.
Tani për tani ne si parti nuk jemi aq mirë sa dukemi, por jemi disa herë më mirë seç ishim para 8 muajsh.
Të paktën jemi, këtë e dëshmoj gara e brendëshme për kryetar degësh, për anëtarë kryesie, për delegatë në këtë kuvend të jashtëzakonshëm.
Kishim më shumë se një dekadë që e kishim shuar garën, e kishim vrarë votën dhe fshirë numërimin e saj…
3. Politika ime e jashtme.
Vendi për të cilin mund ta japë edhe jetën është Shqipëria, i dyti në rradhë vjen Kosova. Të parët e mi e kanë dëshmuar këtë në breza.
Vendi i tretë të cilit i përulem me respekt dhe me krenari janë Shtetet e Bashkuara të Amerikës. Kam arësye thelbësore për këtë. Që kur kam qënë kërthi kam mësuar se një prej arsyeve pse ma pushkatuan gjyshin ishte arësyetimi i tij i prerë:
Jeni lidhur me armiqtë e shqiptarëve, me moskën dhe shkiet po të ishit lidhur me anglo-amerikanët do të rreshtohesha me qef në krahun tuaj.
Shumica absolute e demokratëve jam i bindur që ndajnë mendim të ngjashëm ose të përafërt me mua, por kjo nuk më bën as të shtrij qafën, as ti them “derrit dajë”.
Më shumë se gjysma e shqiptarëve sot janë kundër Edi Ramës por s’mund ti quash ata antishqiptarë, përkundrazi ai dhe haremi i tij qeveritarë spikasin si të tillë.
Në Kosovë në zgjedhjet e fundit vendore u dëshmua qartë se çfarë mbështetje të ulët siguroj Albin Kurti, ata që fituan shumicën e komunave në Kosovë duke filluar nga Prishtina nuk e duan dhe nuk e çmojnë hiç kryeministrin Kurti , as unë se dua por kjo s’më bën as mua, as qytetarët e saj kundër shtetit të Kosovës.
Në Amerikë po të bëheshin zgjedhjet sot Administrata e Presidentit Biden jam i sigurtë që do të pësonte një humbje të thellë.
Por në rast se unë nuk e vlerësoj politikën e Presidentit Biden kjo s’më bën antiamerikan, nqs unë nuk e çmoj kryetarin e bashkisë së NewJorkut kjo s’do të thotë që unë i urrej njujorkezët.
Mbi 99% e amerikanëve nuk e dinë se kush është ambasador i Rusisë apo Kinës në SHBA, kjo shifër thuajse i afrohet 100%-it kur flitet për Shqipërinë, apo Maqedoninë e Veriut.
Ndaj ne si popull duhet që çdo mëngjes kur ngrihemi nga gjumi punë të parë të rregullojmë krevatin ku kemi fjetur, ti lajmë sytë tanë, pse jo edhe dhëmbët dhe pastaj të mendojmë për punë dhe vepra të mëdha globale.
Kaq për politikën e jashtme…
4. Vota si instrument bashkues.
E kam thënë dhe e përsëris që mekanizmi i vetëm që mund të sjellë bashkimin real të demokratëve është vota e lirë dhe e pa dirigjuar.
Por mekanizmi i votës nuk është kaq i thjeshtë, ai së pari kërkon që përdoruesi i saj të jetë demokrat i sprovuar, të jetë njeri i kulturuar, të jetë qytetarë i devotshëm. Kur përdoruesi i votës i plotëson këto tri kushte, vota prodhon siguri, stabilitet dhe qëndrueshmëri.
Kemi rikthyer mekanizmin e votës në PD jemi në rrugë të mbarë, duhet ta përsosim këtë instrument çudibërës që ta zhvillojmë dhe prosperojmë Partinë Demokratike dhe për pasoj edhe vendin tonë.
Nëqoftëse nuk e deformojmë votën brenda familjes tonë politike, ju garantoj që kurrë nuk do të guxoj askush ta deformoj atë, as në zgjedhjet lokale, as në ato të përgjithshme.
5. e fundit.
Procesi i votimit dhe numrimi i votës.
Mekanizmi i votës nuk fillon dhe as mbaron me hedhjen e saj në kuti.
Lista që kanë përpara delegatët e këtij kuvendi kthese dhe shprese është e gjatë.
Por nqs ju të nderuar delegatë jeni zgjedhur me votë të lirë dhe të drejtë në degët tuaja respektive duhet ti kushtoni po aq vëmendje dhe rëndësi fletës së votimit dhe emrave që do të votoni për në Këshillin Kombëtar të PD-së.
Vini re!
Ju sot po zgjidhni ekipin politik që do të udhëheqë betejën për rrëzimin e diktaturës që ka instaluar në Shqipëri Edi Rama,
Ndaj kujdes,
Votoni ata njerëz që e kanë vullnetin, potencialin dhe të drejtën morale për ti udhëhequr demokratët në këtë sfidë jo dhe aq të lehtë.
Ju që numëroni votat keni fuqinë të zhbëni sloganin famëkeq të diktatorit sovjetik Josif Stalin “Populli le të votoj i qetë, ne i numërojnë votat si duam vetë”
Çdo deformim i votës nga numruesit sjell përçarje dhe zhgënjim dhe e shndërron votën në minë me sahat.
Ndaj kam një thirrje për ata që janë ngarkuar ta administrojnë këtë proces të lodhshëm dhe delikat: kryejeni me përgjegjësi këtë mision historik, demokratët dhe shqiptarët do t’ua vlerësojnë gjatë gjestin tuaj fisnik.
Rroftë Partia Demokratike
Rroftë Shqipëria.
Ju faleminderit..
Burimi/Facebook
Leave a Reply