PARALELISHT

Aleksander Shallvari
Ne ecim në dy rrugë paralele,

Në dy rrugë ku s’ka asnjëherë një pikë takimi,
Ti në të djathtë të diellit

Unë hënës kthyer kurrizin.

Ne kemi kohë që në dy rrugë paralele

Ecim pa kthyer kokën as majtas as djathtas,

Nxitojme për në pikën e takimit

Por infinitisht drejt nesh ajo zgjatet.

Përplasemi me erën,shiut nuk i shmangemi,

Grisur këpucët e rënda që gjurmë lëshojnë baltrave

Një kapelë të rogoztë poshtë syve tërë pluhur

Në xhepin e xhaketës një shpresë e lodhur,

Si marathonomakë të çmendur rrugësh humbur.

Humbur në dy rrugë paralele,

Në dy rrugë që kurrë nuk gjetën një pikë

Një pikë,ku takimi të jetë i natyrshëm

Ku asnjeri të mos mundë të ikë…

Ku asnjëri të mos dojë të ikë.

Por ne e dashura ime,

Ecim në dy rrugë paralele pa kthim.

Pa mbërritje,

Pa takim.

Gjeometrikisht abstraktë në përfytyrim.