Nga Vladimir Selamaj
Editoriale
Athinë
Ka ardhur koha që kjo të thuhet hapur, pa ekuivok dhe pa diplomaci të tepërt: politika shqiptare duhet të heqë dorë nga ndërhyrja në jetën e diasporës shqiptare në Greqi.
Për shumë vite me radhë, komuniteti shqiptar në Greqi ka qenë jo vetëm një shtyllë ekonomike për familjet në Shqipëri, por edhe një faktor i rëndësishëm kombëtar, kulturor dhe shoqëror. Me djersën e mijëra emigrantëve, me sakrificat e brezave që ndërtuan jetën larg vendlindjes, diaspora ka mbajtur gjallë lidhjen me atdheun dhe ka kontribuar në mënyrë të jashtëzakonshme në zhvillimin e vendit.
Megjithatë, në vend që të mbështetet dhe të respektohet, kjo diasporë është kthyer shpesh në objekt manipulimi politik.
E majta dhe e djathta në Shqipëri, pa dallim, e kanë parë diasporën jo si një komunitet me halle dhe nevoja reale, por si një hapësirë ndikimi, një terren për kontroll, për përfitim elektoral dhe për shtrirje influence.
Ky është thelbi i problemit.
Në vend që të merren me çështjet madhore që prekin shqiptarët në Greqi , statusin ligjor, dokumentacionin, përfaqësimin institucional, mbrojtjen e të drejtave sociale dhe ekonomike, arsimin në gjuhën shqipe dhe ruajtjen e identitetit kombëtar , energjitë shpesh janë kanalizuar drejt ndarjeve të brendshme politike.
Kjo nuk është rastësi.
Është vazhdimësi e një metode të vjetër politike që historia jonë e njeh shumë mirë: përça e sundo.
Kur partitë politike tentojnë të fusin ndikimin e tyre në shoqatat e diasporës, në forumet qytetare dhe në organizimet komunitare, rezultati është gjithmonë i njëjtë: komuniteti fragmentohet.
Njëra palë etiketohet si e afërt me të majtën, pala tjetër me të djathtën. Aktivistët vendosen përballë njëri-tjetrit. Shoqatat humbasin misionin e tyre qytetar dhe kombëtar, duke u kthyer në zgjatime të betejave politike të Tiranës.
Kjo është një goditje e drejtpërdrejtë ndaj unitetit të shqiptarëve në Greqi.
Dhe pasojat janë të dukshme.
Një komunitet i përçarë nuk mund të ngrejë zërin me forcën e duhur përballë institucioneve greke. Nuk mund të kërkojë me vendosmëri të drejtat e tij. Nuk mund të mbrojë interesat e brezit të ri dhe as të krijojë një përfaqësim serioz e dinjitoz.
Për më tepër, kjo ndërhyrje politike ka krijuar klimë mosbesimi mes vetë shqiptarëve. Në vend të solidaritetit, është mbjellë dyshimi. Në vend të bashkëpunimit, rivaliteti. Në vend të interesit kombëtar, interesi partiak.
Kjo është arsyeja pse sot duhet të ngrihet një thirrje publike e fortë;
Larg duart nga diaspora shqiptare në Greqi
**************************
Diaspora nuk është pronë e asnjë partie. Nuk është terren elektoral dhe as instrument propagande.
Ajo është pasuri kombëtare.
Politika shqiptare duhet të ndalojë menjëherë çdo tentativë për ta përdorur këtë komunitet për interesa të ngushta. Detyra e saj është të mbështesë, të dëgjojë dhe të mbrojë diasporën, jo ta ndajë dhe ta dobësojë.
Nëse sot komuniteti shqiptar në Greqi përballet me probleme të mëdha të brendshme, një pjesë e përgjegjësisë bie pikërisht mbi politikën shqiptare dhe qasjen e saj ndërhyrëse.
Koha e manipulimit duhet të marrë fund.
Diaspora ka nevojë për unitet, pavarësi dhe një zë të lirë.
Vetëm kështu mund të mbrojë dinjitetin e saj dhe të luajë rolin që meriton në jetën kombëtare shqiptare.
Burimi/Facebook
Leave a Reply