“Serbia nuk ka nevojë për armë për të dëmtuar shqiptarët, për sa kohë në tregun tonë hyjnë misër dhe grurë të kontaminuar me aflatoksinë.”

Skandali i zhdukjes së 130 tonëve misër të kontaminuar me aflatoksinë ka ngritur një alarm serioz për sigurinë ushqimore në vend dhe për mënyrën se si kontrollohen produktet që hyjnë në treg. Sasia e konsiderueshme e misrit, e importuar nga Serbia dhe e depozituar në magazinat e kompanisë “MODI SHPK” në Shkodër, ishte bllokuar nga Autoriteti Kombëtar i Ushqimit (AKU) pasi analizat zbuluan praninë e këtij myku toksik, i njohur për rrezikun që paraqet për shëndetin e njerëzve dhe kafshëve.Megjithatë, ndonëse produkti ishte vendosur nën bllokim zyrtar, 130 tonët e misrit janë zhdukur nga magazinat, duke ngritur dyshime të forta për shkelje të rënda ligjore dhe për një skemë të mundshme të shpërndarjes së paligjshme.
Sipas dokumenteve të kompanisë, misri ishte deklaruar për përdorim në ushqimin e shpendëve dhe kafshëve. Por verifikimet e kryera tregojnë se gjurmueshmëria e produktit nuk ekziston, pasi sipas të dhënave fiskale dhe faturave nuk rezulton një shitje e dokumentuar e kësaj sasie të madhe. Kjo situatë lë të hapur pyetjen më shqetësuese: ku kanë përfunduar 130 tonët e misrit të kontaminuar?
Ekspertët e sigurisë ushqimore paralajmërojnë se aflatoksina është një nga toksinat më të rrezikshme natyrore, e cila mund të shkaktojë dëmtime të rënda në mëlçi dhe pasoja serioze për shëndetin nëse produktet e kontaminuara hyjnë në zinxhirin ushqimor.
Zhdukja e një sasie kaq të madhe ushqimi të bllokuar nga autoritetet përbën një rast që kërkon hetim të menjëhershëm dhe të plotë institucional. Nëse një produkt i kontaminuar është futur në treg pa kontroll dhe pa dokumentacion, atëherë bëhet fjalë për një shkelje të rëndë që prek drejtpërdrejt shëndetin e qytetarëve dhe besimin tek sistemi i kontrollit ushqimor.
Ky rast rikthen edhe një herë në vëmendje domosdoshmërinë e kontrolleve më të forta dhe transparencës së plotë për çdo produkt ushqimor që hyn në vend. Sepse kur produkte të kontaminuara arrijnë të zhduken nga magazinat dhe të dalin nga sistemi i kontrollit, rreziku për konsumatorët bëhet real dhe i menjëhershëm.

Burimi/Facebook/Gazeta Albania