Shoqata Alba-Dansk ka reaguar pas fitores së z. Albin Kurti, duke e cilësuar këtë rezultat si një fitore të parimit të ndershmërisë dhe një mesazh të qartë kundër korrupsionit në politikë.
Në deklaratën e saj publike, Alba-Dansk thekson se mbështetja ndaj Kurtit ka qenë konstante dhe e qëndrueshme ndër vite, e ndërtuar jo mbi interesa apo përfitime, por mbi bindjen se ai përfaqëson një figurë politike të pakorruptuar dhe parimore.
“Ne kemi qenë konstant me Kurtin vetëm për faktin se nuk është i korruptuar. Kjo ka qenë arsyeja jonë kryesore dhe e vetme për mbështetje,” thuhet në reagimin e shoqatës.
Sipas Alba-Dansk, në një klimë politike ku korrupsioni ka minuar besimin e qytetarëve ndaj institucioneve, fitorja e Kurtit përfaqëson shpresë për një qeverisje më të pastër, më transparente dhe më të përgjegjshme. Shoqata vlerëson se ky rezultat nuk është thjesht një fitore elektorale, por një sinjal i fortë i qytetarëve për ndryshim dhe llogaridhënie.
Alba-Dansk, e cila vepron prej vitesh në mbrojtje të interesave të komunitetit shqiptar në Danimarkë, shpreh pritshmëri të qarta që mandati i ri të shoqërohet me veprime konkrete në luftën kundër korrupsionit, forcimin e shtetit ligjor dhe ndërtimin e institucioneve të besueshme.
Në përmbyllje, Alba-Dansk i uron z. Albin Kurti suksese në detyrën e tij dhe shpreson që angazhimi për ndershmëri dhe drejtësi të mbetet themeli i vendimmarrjes së tij politike, në shërbim të qytetarëve dhe të ardhmes së vendit.
Nga sektori i shtypit prane shoqates “Alba – Dansk”
Leave a Reply