Një tjetër skandal ka shpërthyer në Ukrainë, duke vënë nën presion rrethin e ngushtë të presidentit Volodymyr Zelensky. Autoritetet kundër korrupsionit në Kiev kanë bërë me dije se një ish-zyrtar i lartë presidencial dhe bashkëpunëtor i afërt i Zelensky-t po hetohet për korrupsion dhe pastrim parash në një aferë miliona dollarëshe.
Sipas mediave ukrainase, bëhet fjalë për Andriy Yermak, një nga njerëzit më të fuqishëm pranë presidentit ukrainas. Hetuesit dyshojnë se ai ka qenë pjesë e një organizate kriminale që ka pastruar rreth 10.5 milionë dollarë përmes projekteve të banesave luksoze pranë Kievit.
Megjithëse autoritetet nuk publikuan zyrtarisht emrin e të dyshuarit, për shkak të kufizimeve ligjore, mediat vendase e identifikuan atë si Yermak. Në një reagim për Radio Liberty, ai mohoi çdo lidhje me pronat në kompleksin e hetuar dhe refuzoi të japë komente të tjera.
Hetimi është pjesë e një operacioni më të gjerë kundër korrupsionit në nivelet më të larta të shtetit ukrainas. Më herët, një ish-bashkëpunëtor biznesi i Zelensky-t u përfshi në një skemë ryshfeti prej 100 milionë dollarësh në sektorin e energjisë atomike, ndërsa edhe ish-zyrtarë të tjerë të lartë janë vënë nën hetim.
Për vite me radhë, Andriy Yermak konsiderohej si krahu më i fuqishëm politik i Zelensky-t dhe një figurë kyçe në negociatat ndërkombëtare të Ukrainës. Largimi i tij nga posti vitin e kaluar u interpretua si shenjë e krizës dhe tensioneve brenda administratës presidenciale.
Skandali i ri rrezikon të godasë rëndë imazhin e qeverisë ukrainase, në një kohë kur Kievi vazhdon të marrë mbështetje financiare dhe ushtarake nga Perëndimi.
Burimi/Facebook/Gazeta E Albania
Leave a Reply