Marrë nga Reuters
Zyrtarët amerikanë bënë të ditur se një raketë që u lëshua nga një avion luftarak F-22 u përdor të premten për të rrëzuar një objekt të paidentifikuar që fluturonte mbi Alaskë. Ky zhvillim vjen pas më pak se një jave, kur Pentagoni goditi dhe rrëzoi një balonë kineze që fluturoi për disa ditë në hapësirën ajrore të Shteteve të Bashkuara.
Objekti me madhësinë e një makine të vogël, u rrëzua me një raketë tha gjeneral brigade Patrick Ryder, zëdhënës i Pentagonit.
Urdhri për rrëzimin e objektit të paidentifikuar u dha nga Presidenti Joe Biden, një përfshirje e rrallë në këtë nivel, duke pasur parasysh llogaritjet fillestare që sugjeronin se objekti nuk përbënte kërcënim ushtarak dhe nuk dukej të ishte i sofistikuar.
I pyetur se pse u pa si e nevojshme të merrej autorizimi i Presidentit Biden, gjeneral brigade Ryder tha se komandanti ushtarak amerikan që mbikëqyr hapësirën ajrore të Amerikës së Veriut, kishte autoritetin për të rrëzuar objekte që përbënin një rrezik ushtarak ose rrezik për popullin amerikan.
“Në këtë rast të veçantë, u përcaktua se objekti përbënte një kërcënim të arsyeshëm për trafikun ajror”, tha zoti Ryder.
Më 4 shkurt, një tjetër avion luftarak amerikan F-22, rrëzoi në brigjet e Karolinës së Jugut, atë që qeveria amerikane e quajti një balonë përgjuese kineze, e cila fluturoi për rreth një javë nëpër Shtetet e Bashkuara dhe disa pjesë të Kanadasë.
Republikanët dhe madje disa nga ligjvënësit demokratë kritikuan presidentin se mori kohë përpara se vepronte duke rrëzuar balonën. Incidenti shkaktoi një krizë diplomatike mes dy ekonomive më të mëdha në botë dhe bëri që Sekretari amerikan i Shtetit Antony Blinken të anulonte një vizitë të planifikuar në Pekin.
Pentagoni dhe Shtëpia e Bardhë nuk pranuan ta përshkruanin në detaje objektin e rrëzuar së fundmi, duke thënë vetëm se ishte shumë më i vogël se baloni kinez. Pentagoni tha se objekti po fluturonte në një lartësi prej 12 km, duke paraqitur një rrezik për trafikun ajror civil.
“Ne nuk e dimë se kush e ka në zotërim këtë objekt”, tha zëdhënësi i Shtëpisë së Bardhë, John Kirby.
Objekti u rrëzua mbi pjesën verilindore të Alaskës, pranë kufirit kanadez. Pentagoni tha se ai ishte zbuluar për herë të parë më 9 shkurt, falë radarëve tokësorë. Më pas ishin dërguar avionë luftarakë për të hetuar më tej situatën.
Zoti Ryder tha se pilotët amerikanë që kishin fluturuar përkrah tij kishin përcaktuar se në bord të objektit nuk kishte asnjë person. Ai shtoi se objekti nuk ngjante me një avionin dhe dukej të ishte i pamanovrueshëm. Zoti Ryder dhe zyrtarë të tjerë nuk mund të thoshin nëse thjesht bëhej fjalë për një balonë që mbikëqyr motin apo një lloj tjetër baloni.
“Nuk ishte një avion”, tha zoti Ryder gjatë një konferencë shtypi.
Prej momentit kur rrëzuan balonën kineze në oqeanin Atlantik, zyrtarët amerikanë po kryejnë një operacion për nxjerrjen e mbetjeve të saj.
Zoti Ryder u tha gazetarëve “një sasi e konsiderueshme” e balonës tashmë ishte gjetur, duke sugjeruar se zyrtarët amerikanë së shpejti mund të kenë më shumë informacion rreth aftsësive të balonës kineze që është përdorur për spiunazh.
“Kjo do të jetë shumë e dobishme për ne që të mësojmë më shumë”, tha zoti Ryder.
Burimi/Zeri i Amerikes
Leave a Reply