18 MAJ 1990 – NJË KRIM QË ENDE KËRKON DREJTËSI!
Në ditët e fundit të diktaturës komuniste, kur Muri i Berlinit kishte rënë dhe popujt e Europës Lindore po fitonin lirinë, në Shqipëri vazhdonte të derdhej gjaku i shqiptarëve që kërkonin të arratiseshin nga regjimi.
Një nga emrat e lidhur me këto krime është Bino Binaj, komandant i Postës Kufitare të Velipojës, në Shkodër.
Më 18 maj 1990, dy vëllezërit Vatë Marash Beqi dhe Gjekë Beqi tentuan të kalonin kufirin për t’i shpëtuar diktaturës.
Ata nuk kërkonin të pushtonin Shqipërinë. Nuk ishin armiq të popullit. Ishin dy shqiptarë që kërkonin atë që regjimi ua kishte mohuar për dekada: LIRINË!
Por në kufirin e Shqipërisë komuniste, dëshira për liri mund të paguhej me jetë.
Sipas dëshmisë së Gjekë Beqit, komandanti Bino Binaj qëlloi mbi dy vëllezërit. Vata u vra, ndërsa Gjekë Beqi mbeti i plagosur.
Vatë Beqi nuk u vra në luftë kundër një ushtrie të huaj. Ai u vra duke kërkuar të largohej nga vendi i vet!
Dhe çfarë bëri diktatura komuniste?
Në vend që të dënonte përgjegjësit, më 5 janar 1991, Ramiz Alia dekoroi Bino Binajn!
Një i ri shqiptar kishte humbur jetën në kufi, ndërsa komandanti i lidhur me vrasjen merrte dekoratë nga regjimi.
KJO ISHTE DREJTËSIA E KOMUNIZMIT SHQIPTAR!
Pas rrëzimit të diktaturës, më 14 maj 1996, Gjykata e Shkodrës e dënoi Bino Binajn me burgim të përjetshëm për krime kundër njerëzimit. Më 5 korrik 1996, Gjykata e Apelit e la në fuqi vendimin.
Por dënimi u dha në mungesë.
Bino Binaj, i njohur më vonë me emrin Besnik Ali Zykaj, ishte larguar nga Shqipëria. Sipas dokumentacionit të publikuar, dënimi nuk ishte ekzekutuar.
Dhe këtu lind pyetja e madhe:
SI ËSHTË E MUNDUR QË NJË NJERI I DËNUAR ME BURGIM TË PËRJETSHËM PËR KRIME KUNDËR NJERËZIMIT TË MOS VUAJË DËNIMIN?!
Ku ishte shteti shqiptar?
Ku ishte drejtësia?
Ku ishte përgjegjësia për gjakun e një të riu që kërkonte vetëm lirinë?
Kanë kaluar më shumë se 36 vite nga vrasja e Vatë Beqit. Shqipëria ka ndryshuar qeveri, presidentë, ministra e deputetë, por plagët e krimeve të komunizmit vazhdojnë të jenë të hapura.
Vatë Beqi nuk duhet të mbetet thjesht një emër në dokumentet e diktaturës.
Ai ishte një bir, një vëlla, një shqiptar që ëndërronte të jetonte i lirë.
KRIMET E KOMUNIZMIT NUK PARASHKRUHEN NË KUJTESËN E NJË KOMBI!
Drejtësia për Vatë Beqin është detyrim ndaj familjes së tij, ndaj viktimave të kufirit dhe ndaj të gjithë shqiptarëve që u vranë vetëm sepse donin të largoheshin nga diktatura.
LAVDI KUJTIMIT TË VATË BEQIT!
TURP PËR DIKTATURËN QË VRISTE SHQIPTARËT NË KUFI!
DREJTËSI PËR VIKTIMAT E KOMUNIZMIT!
K. Cekani
Burimi/Facebook
Leave a Reply