Gazeta prestigjioze belge “De Standaard” i ka kushtuar një intervistë dhe profil të zgjeruar deputetes së pavarur Marjana Koçeku, duke e cilësuar atë si “fytyra e revolucionit shqiptar” dhe një nga figurat e pakta politike që ruajnë besueshmërinë në vend.
Në artikullin e publikuar më 26 tetor 2026, gazetari Jasper Abrahams analizon protestat e vazhdueshme në Shqipëri, pakënaqësinë e të rinjve ndaj elitës politike dhe rolin e Koçekut në mbështetje të lëvizjes studentore.
Sipas gazetës belge, ndonëse protestuesit e rinj kundërshtojnë strukturat tradicionale partiake, Koçeku është shndërruar në një zë politik të këtij brezi. Vendimi i saj për t’u larguar nga grupi parlamentar socialist në qershor, sipas artikullit, i ka sjellë respektin e shumë qytetarëve, veçanërisht të të rinjve.
Në intervistë, deputetja tregon se vendimin për t’u larguar nga mazhoranca e mori vetë, pa u konsultuar as me familjen dhe as me kryeministrin Edi Rama.
Një pjesë e profilit i kushtohet edhe historisë së saj personale, prejardhjes nga malësitë e Dukagjinit dhe angazhimit për mbrojtjen e mjedisit përmes iniciativës “Neomalësorja” dhe përpjekjeve për mbrojtjen e lumit Drin.
Koçeku shprehet se përplasjet me politikat mjedisore të qeverisë dhe qëndrimi ndaj projekteve në zona të mbrojtura ndikuan në vendimin e saj për t’u larguar nga mazhoranca.
Sa i përket protestave dhe thirrjeve të Ramës për dialog, deputetja mban një qëndrim të prerë, duke deklaruar se, sipas saj, koha për dialog ka kaluar dhe kryeministri duhet të japë dorëheqjen.
Ajo kritikon gjithashtu përdorimin e forcës nga policia gjatë protestave, duke e cilësuar atë si joproporcionale dhe duke përmendur raste të përdorimit të shkopinjve të gomës dhe shoqërimit të protestuesve.
Megjithatë, Koçeku thekson se nuk e konsideron veten udhëheqëse të protestuesve, por mbështetëse të tyre, me synimin që zëri i të rinjve të dëgjohet më fort edhe në institucionet politike.
Në përfundim, “De Standaard” e paraqet deputeten e pavarur si një nga figurat e reja që po sfidojnë modelin tradicional të politikës shqiptare, në një kohë kur protestat studentore po kërkojnë ndryshim dhe përgjegjësi nga drejtuesit e vendit.
Burimi/Facebook/Shkodra Politike
Leave a Reply