Diktatorët dhe pushtetarët e korruptuar bien, por liria dhe e drejta e popullit për ta rimarrë të ardhmen nuk shuhet kurrë.
Fjala e urtë e Charlie Chaplinit:
“Urrejtja e njerëzve do të kalojë, dhe diktatorët do të vdesin, e pushteti që ia kanë rrëmbyer popullit do t’i kthehet popullit. Dhe ndërsa njerëzit vdesin, liria nuk do të humbasë kurrë.”
Sot, kjo thënie tingëllon sikur është shkruar për realitetin tonë. Në vendin tonë dhe në shumë vende të tjera, pushteti shpesh ka kaluar në duar të atyre që e shohin politikën si mjet pasurimi personal dhe jo si shërbim ndaj qytetarëve. Shohim se si ligjet shtrembërohen për të mbrojtur të fortët, ndërsa të pambrojturit mbeten të harruar. Shikojmë media të kapura, drejtësi të bllokuar, institucione që funksionojnë për një grusht njerëzish e jo për shumicën.
Por historia nuk gabon: çdo pushtet i ndërtuar mbi padrejtësi është si një ndërtesë mbi rërë — mund të qëndrojë për një kohë, por përfundimisht bie. Shpresat e popullit, zemërimi i tij i grumbulluar dhe kërkesa e pandalshme për liri e drejtësi janë forca që asnjë diktator, asnjë oligark dhe asnjë sistem i korruptuar nuk mund t’i ndalojë përgjithmonë.
Ne jetojmë në një kohë ku duhet të zgjohemi nga apatia. Heshtja jonë është oksigjeni i pushteteve abuzive. Çdo qytetar ka detyrimin moral të kërkojë transparencë, të mos pranojë propagandën si të vërtetë dhe të mos lejojë që frika të zëvendësojë guximin. Sepse liria nuk është dhuratë e përjetshme ,është një e drejtë që duhet mbrojtur çdo ditë.
Mesazhi i Chaplinit nuk është vetëm një thirrje për të besuar te e ardhmja; është një paralajmërim se e ardhmja varet nga veprimet tona sot. Diktatorët bien vetëm kur populli vendos t’i çojë në histori. Dhe kur kjo ndodh, pushteti i kthehet aty ku ka lindur ,te populli.
Burimi/Facebook
Leave a Reply