Heshtën institucionet, heshtën mediat, heshtën partitë, heshtën deputetët, heshtën akademikët e paguar me taksat tona për të “ruajtur kujtesën historike”.
Sot bëhen 114 vjet nga Kuvendi i Greçës – akti i parë shtetformues i kombit shqiptar – dhe askush nuk e kujtoi.
Po ta pyesësh sot një ministër shqiptar, një gazetar televiziv apo një drejtor drejtorie kulturore, shumica nuk e dinë as çfarë është Kuvendi i Greçës.
Sepse historia jonë, në vend që të jetë gur themeli i ndërgjegjes sonë, është bërë ngarkesë që shteti përpiqet ta fshijë, ta heshtë, ta harrojë.
Kuvendi i Greçës – akti themelues që sot përbuzet:
Në 23 qershorin e vitit 1911, në një fshat të vogël në Malësinë e Madhe, në Greçë, u mblodhën prijësit e të gjitha krahinave shqiptare për të hartuar një platformë të qartë kombëtare.
Me pushkën në dorë dhe gjakun ende të ngrohtë në pragun e luftës kundër Perandorisë Osmane, ata burra nuk kërkuan pasaporta, përfitime, tendera apo karrige – kërkuan komb, gjuhë shqipe, arsim shqip, administratë shqiptare, tokë të bashkuar shqiptare.
Kuvendi i Greçës ishte de facto akti i parë politik që shpalli vullnetin e shqiptarëve për vetëvendosje, një vit para Pavarësisë së 1912-s.
Pa Greçën, nuk do të kishte as flamur në Vlorë, as shtet shqiptar.
Shteti shqiptar, pas 114 vitesh, s’e përmend dot as me një status:
Sot, më 2025, ministrat fluturojnë në Dubai, Romë, Berlin e New York për panaire arti me lekët e taksave, ndërsa Greçën nuk e kujtojnë as me një fjali.
Presidenti nuk foli. Kryeministri nuk shkroi. Ministria e Kulturës heshti. Akademia e Shkencave fjeti.
Universitetet nuk organizuan asnjë orë leksioni. Parlamentarët e zonës nuk dhanë asnjë njoftim.
Madje, shumë prej tyre nuk e dinë se Greça është në Malësi të Madhe dhe jo ndonjë fshat në Greqi.
Kuvendi që krijoi kombin, u harrua nga vetë shteti që ai ndihmoi të lindte.
Mediat shqiptare – portale harrese, jo kujtese:
A u fol në mediat shqiptare për Greçën?
As në lajmet kryesore, as në talk-show, as në rubrika kulture, as në rrjetet sociale të televizioneve kombëtare.
Ato portale që japin lajme për pushimet e VIP-ave, që analizojnë rrobat, brekët, sytienat e këngëtareve, që bëjnë sondazhe për Big Brother-in dhe që e zbulojnë “kombin shqiptar” vetëm për ndonjë fitore në Eurovizion – nuk nxorën dot as një artikull për Kuvendin e Greçës.
Sepse ky shtet dhe këto media janë pjesë e të njëjtës industri:
industria e harresës kombëtare.
E kujt është Greça sot?
Greça sot është e atyre pak shqiptarëve që ende besojnë te fjala “komb” pa turp.
Është e atyre që nuk kanë nevojë për ftesa protokollare, që nuk presin subvencione për të ndezur një qiri mbi varret e të parëve.
Greça është e atyre që nuk e llogarisin përfitimin personal, por e matin historinë me gjak e nder.
E kujt nuk është Greça?
• Nuk është e politikanëve që rreshtohen vetëm para kamerave.
• Nuk është e partive që e përdorin flamurin vetëm për fushatë.
• Nuk është e institucioneve që lëpijnë europianët dhe harrojnë shqiptarët.
• Nuk është e mediave që dinë çdo hollësi për horoskopin por jo asgjë për heroinë.
Greça është akti që u tradhtua.
Por kujtesa nuk vdes.
Ata që sot heshtën, nuk e fshijnë dot Greçën nga historia.
E fshijnë vetëm nga kalendarët e tyre politikë të turpit.
Por historia ka kujtesë më të gjatë se çdo qeveri.
Dhe kur ajo kujtesë zgjohet, nuk pyet më për pushtet, për emërime, për ngjyra partiake – pyet vetëm kush ishte me komb e kush jo.
Në Greçë, burra që nuk kishin shkollë, shkruan fatin e Shqipërisë.
Sot, burrat me diploma, nuk dinë as ta përmendin.
Prandaj, 23 qershori 2025 nuk është përvjetor – është aktakuza më e rëndë për një shtet që ka vrarë ndershmërinë historike.
Kuvendi i Greçës nuk kërkon lëvdata.
Ai kërkon drejtësi historike. Dhe kush nuk ia jep këtë drejtësi, është tradhtar i së kaluarës, vrasës i së tashmes dhe armik i së ardhmes.
Greça jeton.
Ju jeni kalimtarë.
Dhe harresa juaj do të jetë mallkimi i emrit tuaj.
Burimi/Facebook
Leave a Reply